Nagalaum ang mga vendor sa Koronadal Public Terminal nga mabalik na sa masunod nga bulan sang Disyembre ang operasyon sang Yellow Bus Line (YBL), bangod dako ini nga bulig sa pagdamo sang pasahero kag customer sa terminal.
Sa interview sang Bombo Radyo Koronadal, ginpahayag ni Lilia Atanoso, isa ka vendor sa nasambit nga terminal, nga nabatyagan nila ang pagnubo sang baligya-anay halin sang nag-untat ang operasyon sang YBL sa terminal. Bangod nagamay ang nagasulod kag nagaguwa nga mga pasahero, na-minos man ang mga tawo nga nagalabay kag nagabakal sa ila mga baligyaan.
Gani, nagalaum si Atanoso nga makabawi sila sa ila pangabuhian kon matuman ang plano nga ibalik ang lima ka YBL bus sa Koronadal Public Terminal sa Disyembre.
Dugang pa niya, handa na sila nga magdugang sang stocks sang ila mga baligya agud maserbisyuhan ang posible nga pagdamo sang mga pasahero sa terminal.
Nagpaabot man si Atanoso sang pagpasalamat sa City Government of Koronadal kag kay Mayor Erlinda Araquil sa ila pagpanikasog nga mabalik ang operasyon sang Yellow Bus Line.
Para sa mga vendor, ang pagbalik sang lima ka bus indi lamang dugang nga transportasyon para sa mga pasahero kundi oportunidad man nga mag-uswag liwat ang ila baligya kag pangabuhian.
