Ginalauman magsumiter sa adlaw sang Lunes, Marso 17 ang paathag sang kampo sang gobyerno sa mandu sang Korte Suprema nga ipaathag ang pag-aresto, pagdetine kag pagpadala kay anay Presidente Rodrigo Duterte sa International Criminal Court (ICC).
Ini ang ginalauman nga isumiter ni Solicitor General Menardo Guevarra nga siya ang nagdawat sang ginserbe nga kopya sang order subong nga hapon sang Biyernes, Marso 14.
Madumduman nga ang unod sang show cause order nga gin-isyu sang SC sang Huwebes sang gabi ang order to explain matapos aksyunan ang 3 habeas copus petition nga ginpasaka sang mga bata sang anay Presidente nga sila Davao City Mayor Sebastian “Baste” Duterte kag Veronica “Kitty” Duterte sang Marso 12.
Gintagaan sang korte ang gobyerno sang 24 oras agud magsabat diri, apang bangod sa weekend nga deadline, posible masumiter ang mga respondent ang ila nga explanation sa Lunes.
Magluwas kay Guevarra, kabilang pa sa mga respondent sila Executive Secretary Lucas Bersamin, Department of the Interior and Local Government (DILG) Secretary Jonvic Remulla, Philippine National Police (PNP) Chief General Rommel Marbil, PNP-CIDG chief Gen. Nicolas Torre III , Foreign Affairs Secretary Enrique Manalo, Armed Forces of the Philippines (AFP) Chief of Staff Romeo Brawner Jr., Executive Director of the Philippine Center on Transnational Crime (PCTC) Undersecretary Lt. Gen. Antonio Alcantara, Capt. Johnny Gulla kag Bureau of Immigration (BI).
