Dako ang ginnubo sang numero sang mga kabataan nga nagatrabaho sa pungsod halin sa 828,000 sang 2022 panubo sa 509,000 sang 2024 bangud sang ginpabakod nga kampanya sang gobyerno batok sa child labor, suno sa Department of Labor and Employment (DOLE).
Suno sa DOLE, resulta ini sang mas mabakod nga mga programa sang gobyerno kag sang pagbinuligay sang nagkalainlain nga sektor agud mapalayo ang kabataan sa hulga sang child labor kag masiguro nga nagapadayon sila sa pag-eskwela.
Kadungan sang pagsaulog sang Philippine Independence Day, nagapanawagan si Acting Labor Secretary Francis Tolentino sa publiko nga magbulig sa pagduso sang isa pa ka porma sang kahilwayan para sa mga kabataan—ang kahilwayan halin sa child labor.
Ginpabutyag man niya ang importansya sang pagbinuligay sang tanan nga sektor samtang nagapakigbahin ang Pilipinas sa pagsaulog sang World Day Against Child Labor 2026 sa idalom sang tema nga “Red Card to Child Labor: Fair Play for Children, Decent Work for Adults.”
Suno kay Tolentino, ang tema nagapanawagan sang mas mabaskog nga pagpatuman sang mga polisiya kag programa nga nagatinguha sa pagpugong kag pagtapna sang child labor sa pungsod.
Bilang kabahin sang isa ka bulan nga kampanya, nagapatigayon ang mga talatapan sang DOLE sa bug-os nga pungsod sang nagkalainlain nga aktibidad kasubong sang information kag advocacy drives, service caravans, mga oryentasyon nahanungod sa Republic Act No. 9231, paghatag sang livelihood assistance, gift-giving activities sa idalom sang Project Angel Tree, DOLEkula Film Festival, kag mga Run for a Cause nga mga kalihukan.
