KORONADAL CITY – Suportado ang National Food Authority (NFA) South Cotabato ang ginaduso nga amyendaran ukon rebisahon ang kontrobersiyal nga Rice Tarrification Law (RTL) agud mapanubo ang presyo sang bugas sa pungsod.
Ini ang nangin pahayag ni Mr. Jeomar Fajartin, OIC Manager, NFA – South Cotabato sa interview sang Bombo Radyo Koronadal.
Ini makaligad nga ginsertipikahan bilang urgent bill ni Pangulong Ferdinand Marcos, Jr. ang ginaduso nga pag-amyendar sa Rice Tarrification Law (RTL) agud mapanubo ang presyo sang bugas sa pungsod.
Suno kay Marcos, problema sa pagsaka sang presyo sang bugas amo mismo ang mga traders nga nagakompetensyahanay. Nagapataasay ang mga ini sa presyo sang pagbakal sang bugas kag wala sang kontrol diri.
Mahimo naman nga maimpluwensyahan ukon kontrolon sang gobyerno ang presyo sang bugas sa tion ma amyendaran ang rice tarrification law partikular na sa pagbakal sang humay kag pagbaligya sang bugas sa merkado.
Suno naman kay House Speaker Martin Romualdez, mahimo mabuhinan sang P10 tubtob P15 ang kada kilo sang bugas sa tiun ma amyendaran na ang Rice Tarrification Law.
