Ginpabutyag sang isa ka manunulat kag manunudlo ang importansya sang pagpreserbar kag pagpauswag sang Hiligaynon kag Kinaray-a bilang kabahin sang identidad kag kultura sang mga komunidad.
Sa interview sang Bombo Radyo Koronadal kay Alvin Larida, manunudlo kag manunulat, iya ginpahayag ang importansya sang lokal nga mga lengguwahe indi lang koleksyon sang mga pulong, sa baylo sa buhi nga pamatuod sang maragtason nga panghuna-huna, kag eksperyensya sang katawhan.
Suno kay Larida, paagi sa literatura, mapabilin ang mga tradisyon kag pangabuhi sang isa ka komunidad.
Nagpaalinton man si Larida sa publiko nga mahimo madula ang pila ka tradisyunal nga mga pulong kun indi na ini ginagamit bangud sa impluwensya sang social media kag moderno nga teknolohiya.
Gani, ginpunto niya nga importante nga magpadayon ang paggamit sang lokal nga mga lengguwahe, ilabi na sang mga pamatan-on kag bag-o nga mga manunulat, sa paghimo sang mga obra nga nagapakita sang ila kultura kag identidad.
Dugang pa niya nga kinahanglan suportaran ang mga manunulat sa South Cotabato kag SOCCSKSARGEN paagi sa mga programa para sa lokal nga literatura.
