Nagapanawagan ang mga residente sang Purok Ugnayan, Barangay GPS, Koronadal City sa DPWH kag sa iban pa nga mga natungdan nga ahensya nga padasigon ang permanente nga rehabilitasyon sang naguba nga drainage system antes pa madugangan ang mga pamilya nga maapektuhan sang padayon nga pagkatiphag sang duta.
Sa interview sang Bombo Radyo Koronadal kay Angeline Vanguardia, residente sang nasambit nga barangay, iya ginpahayag nga nagalala ang sitwasyon bangud ang soil erosion yara na lamang sa mga 10 metros halin sa ila panimalay, gani may mga residente nga napilitan na magbalhin sang alagyan bangud indi na maagyan ang naguba nga dalan.
Ginpahayag niya nga nagumpisa ang pagtiphag sang isa ka culvert pasado alas-5:00 sang hapon sang Hulyo 30 kag nagpadayon tubtob sa gab-i, samtang ang problema nagsugod pa pagkatapos sang linog sang Hunyo 8.
Gilayon naman nga nagresponde na ang Department of Public Works and Highways kag ang City Government sang Koronadal pinaagi sa pagdala sang backhoe kag pagkakas sang pila ka culvert agud malikawan ang mas tuman nga aksidente, apang nagapadayon gihapon ang pagkatiphag sang duta.
Ginpahibalo man sang city government ang mga residente nga posible sila nga pabakwiton kun maglala pa ang sitwasyon, samtang ginalauman nga may malawig nga solusyon nga ipatuman sa lugar.
