Ginpahayag sang National Food Authority (NFA) nga may bastante ini nga pondo para sa pagpatuman sang mas mataas nga presyo sang pagbakal sang palay halin sa lokal nga mga mangunguma.
Suno kay NFA Administrator Larry Lacson, may P9 bilyon nga pondo ang ahensya sa idalom sang General Appropriations Act kag dugang nga P10 bilyon halin sa Department of Agriculture.
Sa Kasamtangan nga ginabakal na sang NFA sa P30 kada kilo ang limpyo kag uga nga palay, samtang may separado nga presyo para sa basa nga ani.
Ginpaathag ni Lacson nga ginpasaka ang presyo halin sa una nga target nga P27 bangud dyutay lamang ang mga mangunguma nga nagabaligya sa amo nga kantidad.
Isa sa mga rason sini amo ang nagasaka nga presyo sang abuno kag gatong nga nagadugang sa gasto sa pagpanguma.
Samtang, target sang ahensya nga makakolekta sang 500,000 metric tons nga palay agud mapabakod ang buffer stock sang pungsod kag masiguro ang bastante nga suplay sang bugas.
