Magabakal ang National Food Authority (NFA) sang bag-o kag basa nga palay sa P21 kada kilo sa bug-os nga pungsod sa tion sang tig-ululan nga anihan, mas mataas kumpara sa una nga minimum buying price nga P17 kada kilo.
Suno kay Agriculture Secretary kag NFA Council Chairperson Francisco Tiu Laurel Jr., ang pagsaka sang presyo nagatinguha nga mabuligan ang mga mangunguma sa mataas nga gasto sa produksiyon, ilabi na sa abono kag iban pa nga farm inputs.
Gindugang ni NFA Administrator Larry Lacson nga ini magahatag sang ginatantya nga P3 tubtob P5 nga kita kada kilo sa mga mangunguma.
Samtang, gin-anunsyar man ni Tiu Laurel ang temporaryo nga pagpauntat sang pagdiskarga sang imported nga bugas sa Iloilo halin tunga sang Setyembre tubtob katapusan sang Nobyembre agud maproteheran ang presyo sang lokal nga palay sa tion sang peak harvest season.
