KORONADAL CITY – Masobra duha na ka tuig nga wala sang aksyon halin sang matiphag ang dike sa may bahin sang Barangay Namnama, Koronadal City.
Ini ang ginpahayag ni Jan Gandola, residente sang nasambit nga barangay, sa exclusive interview sang Bombo Radyo Koronadal.
Suno sa iya, ginpaabot na sang ila barangay kapitan sa DPWH ang problema, apang tubtob subong, wala gihapon sang ginpatigayon nga konkreto nga solusyon ang ahensya.
Dugang pa ni Gandola, bangod sang makusog nga mga bunok sang ulan, nagdaku pa ang tiphag kag nagdangat na sa isa ka ektarya ang lupang ginlamon sang tubig. Resulta sini, nagasulod na ang baha sa ila mga palayan kag nagatuga sang daku nga problema sa ila pangabuhian.
Samtang, ginpahayag man ni Barangay Kapitan Joel Damo nga makapila ka beses niya na ini nga ginpalab-ot sa talatapan sang DPWH , apang wala pa gihapon sang konkreto nga aksyon. Gani, nagapanawagan si Damo sa ahensya nga kuntani hatagan sang matinud-anon nga aksyon kag personal nga lantawon ang lugar nga naguba, kag indi lamang paggamitan sang drone sa pagchekyar sang sitwasyon.
Ginalauman sang mga residente nga sa dason nga mga inadlaw, matagaan na sang insakto nga solusyon ang problema sa dike sa Barangay Namnama antes pa ini maglala kag magdulot sang mas madaku nga pinsala.
