Nagapangasubo subong si Kris Jenner matapos nagtaliwan ang iya iloy nga si Mary Jo Campbell sa edad nga 91 anyos.
Gin-anunsyar ni Kris ang balita pinaagi sa social media post, paagi sa isa ka emosyonal nga tribute para sa iya iloy nga iya ginkilala bilang nagtudlo sa iya sang pinakaimportante nga leksyon sa kabuhi.
Suno kay Kris, si Mary Jo ang “tagipusuon” sang ila pamilya kag nagtudlo sa ila sang importansya sang gugma, kaayo, pagtuo sa Diyos kag pagahatag sang importansya sa pamilya.
Ginpasalamatan man niya ang iya iloy sa tanan nga sakripisyo kag wala kondisyon nga gugma nga iya nahatag sa ila.
Ginpahayag man ni Kris nga padayon nga mabuhi ang handumanan sang iya iloy paagi sa ila pamilya, mga tradisyon kag sa kabuhi sang iya mga kabataan kag mga apo.
Wala pa nagpagwa ang pamilya sang opisyal nga kabangdanan sang iya kamatayon.
Matapos ang anunsyo ni Kris, naghatag man sang ila tagsa ka tribute ang mga miyembro sang Kardashian-Jenner family para kay Mary Jo pinaagi sa social media.
Madumduman nga nalampuwasan man niya anay ang breast cancer kag colon cancer, apang nagpadayon ang pila ka komplikasyon sa iya panglawas sa nagligad nga mga tuig.
