KORONADAL CITY – Nakuhaan sang kwarta ang duha ka gasolinahan nga nangin biktima sang isa ka holdaper nga nakabonet kag nagamaneho sang ginkawat man sini nga tricycle, Sabado sang gab-i.
Ang nasambit nga mga gasolinahan ang ginalakipan sang Petro Gazz nga nahamtang sa JM Robredo Avenue kag Riavin nga nahamtang naman sa Barangay Sta. Cruz, Koronadal City.
Sa interview sang Bombo Radyo Koronadal kay Christelyn Masinadyong, Supervisor sang Petro Gazz isa suno pa ka lalaki nga nagamaneho sang tricycle nga wala sang plate number ang nagpagasolina sang 100 kag sang nagbayad na ini nagdeklarar na lamang sang hold-up samtang ginatayaan sang armas ang pump attendant.
Ginpahayag suno pa sang holdaper nga kwarta lamang ang kinahanglan sini, gani sa kahadlok sang pump attendant nga tiruhon ginhatag sini ang tanan nga kwarta sa ila nga kaha.
Nahibaluan nga ikatatlo na ang Petro Gazz nga biktima sang sina nga gab-i, ang una amo ang tricycle nga ginkawat sang holdaper samtang ikaduha ang Riavin nga ginholdap.
Gilayon naman nga nagpalagyo ang holdaper matapos nga makuha ang kwarta.
Nagreport man gilayon sa kapulisan ang mga biktima.
Sa karon, ginauyatan na sang kapulisan ang CCTV footage agud madasig nga ma-identify ang suspek.
Samtang, panawagan naman ni masinadyong sa tanan nga mangin alerto kag maghalong sa mga malain nga tawo agud indi mabiktima.
