KORONADAL CITY – Patay ang isa ka motorista matapos nga madisgrasya sa Gensan Drive, Koronadal city pasado alas-10 kaina sang aga, Biyernes, Marso 1,2024.
Ini ang ginkumpirmar ni PMSGT Leo Dimaculangan, City traffic investigator sa interview sang Bombo Radyo Koronadal.
Ginkilala ang biktima nga si Aeron Corpuz, 19 yrs old, estudyante sang Ramon Magsaysay Memorial Colleges kag residente sang Brgy. Sto. Niño, Koronadal City.
Suno kay Dimaculangan, naguwa sa ila imbestigasyon nga madasig ang dalagan sang motorsiklo nga ginamaneho ni Corpuz rason nga nakabunggo ini sa isa ka SUV nga nagmenor bangud ang ginasundan sini nga motorsiklo ang naghana nga magliko sa concrete barrier.
Bangud sa kabaskog sang pagkabunggo ni Corpuz sa SUV nagtabog ini sa pihak nga lane rason nga nalapakan naman ini sang ten wheeler truck.
Nadala pa sa hospital ang biktima apang bangud sa severe head injury ginbawian ini sang kabuhi.
Sa karon, may initial nga settlement na ang mga driver sang involved nga salakyan kag ang pamilya sang napatay nga motorista.
Samtang, wala pa ma-identify ang driver sang motorsiklo nga naghana nga magliko sa barikada nga amo ang gintunaan sang disgrasya.
Kaangot sini, nagapanawagan ang City traffic sa tanan nga motorista nga maghinay sa pagmaneho, mangin disiplinado agud makalikaw sa disgrasya.
