Wala na sang pagduha-duha pa nga ginsunog sang isa ka British millionaire ang kaugalingon nga balay agud lamang indi mapuslan sang iya asawa matapos nakipagbulag sa iya.
Suno sa report, antes sunugon sang 50-anyos nga professional golfer nga si Francis McGuirk ang ila puloy-an, nagpadala pa ini sang voice message sa iya asawa nga si Sarah McGuirk nga sunugon ang ilay balay.
Matapos ang pagpadala sang mensahe ginsindihan sini ang ila balay nga yara sa seafront lot sa Dover District sang Kent sa south-east England nga nagabalor sang US $1.4 million ukon PHP81,789,400.
Maswerte na lamang natalupangdan sang ila kalapitbalay rason nakatawag sang bombero kag napalong ang kalayo.
Ginpahayag naman ni Francis sa mga otoridad nga indi sini luyag makuha sang iya asawa ang tanan matapos ang ila pagbulagay.
Bangud sini, ginpasakaan sang kaso si Francis sa diin tubtob subong padayon pa gintratar.
