Gindepensahan ni Joenary Castañares, Head sang Taskforce Kaayusan sang Koronadal City, ang pagpatuman sang penalidad sa mga manugbaligya ukon vendors nga nagalapas sa ordinansa, kag ginpahanumdom nga madugay na ini nga yara sa mga nagapatuman nga pagsulundan sang lokal nga gobyerno.
Ini ang nangin pahayag ni Castañares sa interview sang Bombo Radyo Koronadal, sa diin iya ginpaathag man nga may yara sang apat ka ginpreparar nga lugar nga mahimo pilian sang mga vendors nga ginpahalin sa ila mga daan nga puwesto.
Suno kay Castañares, may yara sang nagkalain-lain nga kategorya nga ginabasehan sang ila talatapan sa pagpatuman sang penalidad, ilabi na sa mga vendors nga nagalapas sa ordinansa kag nagapuwesto sa mga lugar nga ginakabig nga risk areas.
Para sa mga nagaatubang sang first offense, mahimo nila nga mabawi ang ila mga kagamitan nga ginkumpiskar sang Taskforce Kaayusan, apang kinahanglan nila nga magpirma sa logbook agud marekord kag mamonitor ang ila mga paglapas.
Dugang pa ni Castañares, base sa rekord sang ila talatapan, nadiskubrehan nga ang iban nga vendors nga nabalikan na sang ila mga kagamitan may yara na gali sang nauna nga paglapas, gani padayon nga ginapabaskog sang otoridad ang pagpatuman sang penalidad sa mga wala nagasunod sa ordinansa.
Samtang, ginpahayag man ni Castañares nga wala ginapilit ang tanan nga vendors nga magpuwesto sa isa lamang ka lugar matapos sila ginpahalin sa ila mga daan nga baligyaan.
Suno sa iya, ang apat ka ginpreparar nga pagpili-an amo ang Sueno, atubangan sang palaabuton nga Robinsons, Night Market, kag sa Protech Center.
Apang, indi tanan nga vendors ang nagsunod sa mga lugar nga gin-assign sang lokal nga gobyerno, bangud ang iban ang nagpili nga magpuwesto sa mga pribado nga propiedad, samtang ang iban naman ang nagbalhin sa mga lugar nga ginpreparar para sa ila.
Ginpaathag ni Castañares nga ang paghatag sang nagkalain-lain nga pagpili-an nga puwesto kag ang pagpatuman sang ordinansa kabahin sang panikasog sang lokal nga gobyerno nga mapabilin nga organisado ang pagbaligya sa Koronadal City.
