Mas nangin aktibo kag makahulugan ang selebrasyon sang Cooperative Month subong nga Oktubre sa syudad sang Koronadal, paagi sa nagkalain-lain nga aktibidad nga nagatuyo sa pagpauswag sang kooperatiba, journalism, kag pagserbisyo sa komunidad.
Sa interview sang Bombo Radyo Koronadal, ginpahayag ni Jonathan B. Enmanuel, City Cooperative Officer sang Koronadal, nga nangin kabahin ang mga kooperatiba sa Charter Anniversary kag Negosyo Festival, lakip ang caravan, business mindset seminar, kag interschool TV kag radio broadcasting competition nga ginpartisiparan sang mga eskwelahan sa bug-os nga SOCKSARGEN.
Suno kay Enmanuel, paagi sa sini nga mga aktibidad, luyag nila nga mapalapnag ang ihibalo sang publiko, ilabi na sang mga pamatan-on, tuhoy sa papel sang kooperatiba sa pagpauswag sang pangabuhi kag ekonomiya sang komunidad.
Kabahin man sang selebrasyon ang pagbisita ni Peabody Award-winning broadcast journalist kag UP Diliman Department of Journalism Chairperson Kara David, nga naghatag sang oportunidad sa mga estudyante nga mapauswag ang ila abilidad kag ihibalo sa journalism.
Dugang pa, nagpatigayon man ang ila talatapan sang community extension kaupod ang Yaman ng Kalusugan Program ukon YAKAP caravan sa Purok Lansang, Barangay San Roque.
Samtang, ginapaabot ang masunod nga mga aktibidad, lakip ang Gawad Parangal para sa mga outstanding cooperatives kag ang Provincial Cooperative Summit sa Oktubre 29, 2026, sa South Cotabato Gymnasium and Cultural Center.
Ginpahayag ni Enmanuel nga nagapadayon ang selebrasyon sa bilog nga bulan sang Oktubre, nga nagatuyo sa pagpalig-on sang papel sang mga kooperatiba sa edukasyon, ekonomiya kag pagserbisyo sa komunidad.
