Ginpanginwala sang White House ang mga report nga may plano ang administrasyon ni US President Donald Trump nga pag-ilisan ukon pagasibakon ang pila ka mataas nga opisyal sang gobyerno, tunga sang nagapadayon nga mga espekulasyon nahanungod sa direksyon sang administrasyon matapos ang katapusan nga midterm elections.
Nalakip sa mga ginatudlo nga posible nga makakas sa puwesto sanday Defense Secretary Pete Hegseth kag Secretary of State Marco Rubio, nga duha sa mga importante nga personalidad sa administrasyon ni Trump.
Ginaangot ang nasambit nga mga report sa resulta sang katapusan nga US midterm elections, kun sa diin wala nakakuha sang ginapaabot nga kadalag-an ang partido ni Trump. Bangud sini, nagdamo ang mga pamangkot parte sa posibilidad sang pagbag-o sa komposisyon sang administrasyon kag sa mga opisyal nga magapadayon sa ila mga katungdanan.
Dugang pa sa kontrobersiya, may isa ka outgoing Republican congressman nga nagpahayag sang plano nga suportahan ang impeachment vote batok kay Hegseth, nga nagdugang pa sa politikal nga pressure nga ginaatubang sang opisyal.
Sa pihak sini, ginpanginwala ni Rubio ang mga report nga magabiya siya sa iya posisyon agud magpreparar para sa 2028 presidential elections.
Ginpahayag naman sang White House kag US State Department nga wala sing kamatuoran ang mga report nahanungod sa posible nga pagbiya sa puwesto sang duha ka opisyal, kag gintawag ini nga fake news.
Sa karon, nagapabilin nga sentro sang atensyon ang mangin sabat sang administrasyon ni Trump sa nagadamo nga mga espekulasyon, ilabi na sa tunga sang mga pagpamangkot parte sa iya liderato kag sa direksyon sang Republican Party.
