KORONADAL CITY – Gilayon man nga nag-subside ang baha sa bahin sang National Highway sa Barangay Población, Tantangan, South Cotabato matapos ang pila ka oras nga pagbuhos sang ulan kahapon nga adlaw.
Ini ang ginpahayag ni Brgy.Capt. Edwin Cueva sang Barangkay Población, Tantangan South Cotabato.
Suno kay Kapitan Cueva, nakaperwisyo sa madamo nga mga motorista ang baha bangud sa pag-awas sang tubig sa kanal sa national highway.
Nagresulta man ini sang trapiko kun diin may pila ka mga salakayan ang nalumos nga wala na nag-andar samtang may nag-over-shoot man sa kanal nga motorsiklo.
Magluwas sini, may pila ka mga panimalay man ang nasudlan sang tubig baha.
Dugang pa ni Cueva nagbakwit ang pila ka mga pumuluyo sa nasambit nga lugar apang sang nagtahaw na ang baha nagbalik naman ang mga ini sa ila puluy-an.
Kaangot sini, nagpanawagan naman ang opisyal sa mga pumuluyo nga mangin alerto sa tion nga magbuhos ang mabaskog nga ulan.
Ginpasiguro man sini nga nagabantay ang mga opisyal sa barangay sa tion nga may kalamidad kag nakahanda nga magresponde sa tanan nga oras.
