KORONADAL CITY- Ginkaalarma sang South Cotabato PNP ilabi na sa banwa sang Sto. Niño South Cotabato ang intelligence report nga nagapadulong na sa kabukiran ang mga durugista nga luyag ipalusot ang iligal nga droga sa probinsya.
Sa interbyu sang Bombo Radyo Koronadal kay Police Chief Inspector Ritchel Cabuslay, hepe sang Sto. Niño PNP, mas ginpahugtan pa nila ang ila monitoring ilabi na sa Brgy. Ambalgan sa nasambit nga banwa nga notoryus nga lugar sa illegal drug trade.
Dugang pa sini nga bangud sa pag-install sang police checkpoint sa nasambit nga barangay kag pag-install sang mga CCTV camera nagpangita na suno pa sang iban nga pamaagi ang mga durugista kun sa diin sa bukid na ang mga ini nagapatigayon sang ila transaksyon agud indi madakpan.
Kaangot sini, dismayado ang kapulisan bangud pila sa mga anay natokhang na ang nagbalik naman sa bisyo kag nagabayad pa sang ila lookout kag naga-usar sang codename agud indi mabuyagyag ang ila transaksyon.
Nahibaluan nga bangud sa drug proliferation sa Brgy. Ambalgan, gin akusahan ni PDEA 12 Director Gil Castro si Brgy. Ambalgan kapitan Taba Ambalgan nga incompetent ukon nakapatong sa iligal nga droga butang naman nga ginpanginwala sang barangay kapitan.
