Gin-aprobar sang Estados Unidos ang baligya sang 500 ka Patriot missile interceptors para sa Ukraine agud mapabakod ang depensa sini batok sa nagadugang nga aerial attacks sang Russia.
Suno sa US State Department, nagabalor sang $2.1 bilyon ang mga PAC-3 missiles nga pondohan sang mga kaalyado sang Ukraine sa Europe kag Canada.
Wala naman sang pondo halin sa gobyerno sang US nga gamiton sa sini nga transaksyon.
Magabulig sa pagpondo ang Canada, Germany kag Norway paagi sa JUMPSTART program, upod ang suporta pinansyal sang European Union.
Ang American defense company nga Lockheed Martin amo ang mangin panguna nga kontraktor.
Una na nga nagpahayag sang pagkabalaka si Ukrainian President Volodymyr Zelensky bangud halos isa na ka bulan sila nga nagahulat sa pag-aprobar sang kinahanglanon nga missile supplies.
Importante ang Patriot system sa depensa sang Ukraine batok sa ballistic missiles sang Russia, ilabi na samtang nagadamo ang mga pag-atake sa mga syudad kag pasilidad sang enerhiya sang pungsod.
Apang, wala pa sang kasiguruhan kun san-o ma-deliver ang mga missile bangud bag-o pa ini nga pagaproduksion.
Ginapahayag nga mga 600 lamang ka Patriot missiles ang mahimo ma-produce kada tuig, rason nga nagapabilin ang kakulangon sini sa bug-os nga kalibutan.
Sa pihak sini, nagapadayon ang pagpangabay ni Zelensky sang dugang kag mas madasig nga suporta militar agud mapabakod ang seguridad sang Ukraine batok sa Russia.
