Mga ka-bombo!! bal-an nyo bala Nagtiniripon ang grupo sang mga chef sa Guatemala agud magpreparar sang pinakadaku nga fiambre salad nga nagbug-at sang 4,325.9 ka libra ukon katumbas sang kapin 1,962 ka kilo, nga nakarekord sang bag-o nga world record.
Ang pagpangabudlay agud makasulod sa Guinness World Records, nga gin-organisa sang food company nga Toledo Alimentos, naglakip sang pagtakud sang kapin 4,000 ka libra nga karne kag mga utan nga ginsagulan sang dressing sa Guatemala City, agud makuha ang titulo nga pinakamadaku nga fiambre salad sa kalibutan.
Lakip sa mga sangkap sang nasambit nga salad ang itlog, cold cuts, sausage, mais, bell pepper, lettuce, sibuyas, kag nagkalain-lain pa nga klase sang karne kag mga utan.
Ginpahigayon ang record attempt sang Sabado, antes ang pagselebrar sang All Saints’ Day sa Nobyembre 1 kag All Souls’ Day sa Nobyembre 2, nga amo ang mga okasyon nga naandan nga ginahanda kag ginakaon ang fiambre salad.
Matapos ini nga gin-usisa kag gintimbang sang adjudicator sang Guinness World Records, ginpanagtag ang nasambit nga salad sa mga tawo nga nagtambong sa aktibidad.
