Naglab-ot na sa P6,800 kada gramo ang presyo sang shabu sa merkado halin sa P3,800 sang 2022, nga suno kay Department of the Interior and Local Government (DILG) Secretary Jonvic Remulla nagapakita sang posible nga pagnubo sang suplay sang ilegal nga droga sa Pilipinas.
Suno kay Remulla, nagakahulugan ini nga mas nagabudlay na ang mga nagabaligya sang ilegal nga droga sa pagkuha sang ila suplay.
Ginpahayag ini sang kalihim sang Nobyembre 4, sa presentasyon sang 200 kilos nga shabu nga nasamsam sang mga otoridad sa Manila International Container Port (MICP) sang Oktubre 15.
Dugang pa ni Remulla, nagasaka na sa kapin 70 porsyento ang presyo sang shabu kon ikumparar sa 2022, nga iya ginakabig nga indikasyon sang pagnubo sang available nga suplay.
Apang, ginaklaro nga ang pagsaka sang presyo indi nagakahulugan nga nadula na ang ilegal nga droga sa pungsod, samtang nagapadayon ang operasyon sang mga otoridad batok sa pagbaligya kag pagpanagtag sini.
