Masobra 5,300 ka tawo, lakip ang mga Pilipino, ang padayon nga ginapugngan sa mga online scam center malapit sa border sang Myanmar kag Thailand bisan pa sa padayon nga operasyon batok sa human trafficking kag online fraud.
Suno sa Civil Society Network for Human Trafficking Victim Assistance (CSNHTV), madamo sa mga biktima ang mga dayuhan nga ginapabilin sa mga pasilidad nga kontrolado sang isa ka armadong grupo sa Myanmar.
Lakip sa ila ang mga halin sa China, Thailand, Malaysia, Brazil, Russia, Kenya, kag Pilipinas.
Suno sa United Nations, ang mga scam center sa pila ka bahin sang Southeast Asia ang nalambigit sa malapad nga online fraud nga nagahatag sang bilyon-bilyon nga dolyar nga kita kada tuig.
Madamo sa mga nagatrabaho diri ang ginatudlo nga biktima sang human trafficking matapos maluko sa saad nga maayong trabaho kag ginpwersa nga maghimo sang online scams.
Sang nagligad nga tuig, nakaluwas ang Thailand sang halos 5,000 ka tawo halin sa mga scam hub sa Myawaddy, Myanmar, apang suno sa CSNHTV, madamo pa nga scam compound ang padayon nga nagapadagan kag wala pa naabot sang rescue operations.
Nagapadayon gihapon suno pa ang mga sindikato sa paghimo sang online fraud kag human trafficking nga nakaapekto sa mga biktima sa nagkalain-lain nga bahin sang kalibutan.
