Nakatalana nga i-deploy sang Philippine National Police (PNP) ang kapin 5,000 ka augmentation personnel sa BARMM bilang kabahin sang ginpalig-on nga security preparations para sa BARMM Parliamentary Elections sa Septyembre 14, 2026.
Sa interview sang Bombo Radyo Koronadal kay PBGen Jemuel F. Siason, Deputy Regional Director for Administration sang Police Regional Office-BAR, iya ginpahayag nga halin ang mga augmentation personnel sa Regions 9, 10, 11, 12 kag 13, dugang pa sa mga personnel sang PNP Special Action Force kag Maritime Group.
Suno kay PBGen Siason padayon nga ginapalig-on sang PNP, Comelec, Armed Forces of the Philippines kag Philippine Coast Guard ang koordinasyon para sa seguridad sang eleksyon.
Suno kay Siason, pagadugangan man ang mga checkpoint, ilabi na sa mga border areas sang Region 12 kag BARMM, sugod 10 ka adlaw antes ang eleksyon.
Padayon man nga tutukan sang mga awtoridad ang mga private armed group, terorista nga grupo, kriminal kag iban pa nga posible nga pamahog sa tion sang eleksyon.
Samtang, ginpahayag ni Siason nga minimal pa ang mga paglapas sa Comelec gun ban, apang ginapaabot nga posible ini nga magdamo samtang nagahilapit ang eleksyon.
Samtang, ginaproseso man sang PNP ang mga pangabay para sa protective security sang mga kwalipikado nga election officials kag iban pa nga personalidad.
