Ginpamatbatan sang guilty sang Sandiganbayan si anay Maguindanao Governo Datu Islam Sajid Ampatuan kag ginpahamtangan sang silot nga pagkapreso sang 8 tubtob 12 ka tuig bangud sa kaso nga graft kag reclusion perpetua ukon tubtob nagakabuhi nga pagkapreso.
Ginapabayad man ini sang Sandiganbayan sang P393 million sa national treasury bilang penalidad sa kaso nga malversation of public funds.
Sa 65-page decision sang anti-graft court, ginadumilian man si Ampatuan nga mag-uyat sang anuman nga elective ukon appointive position sa gobyerno.
Nag-ugat ang kaso sini sa ginpatukod ngna farm to market road sang tuig 2009 samtang si Ampatuan ang nagapamuno sa probinsiya.
Naguwa man sa imbestigasyon nga ghost project ang farm to market roads.
Nahibaluan nga sang May 2024, napamatud-an sang Sandiganbayan 5th Division si Sajid Ampatuan kag anay provincial budget officer Datu Ali Abpi nga guilty sa kaso nga graft kag malversation of public funds bangud sa P16 million nga ghost projects nga ginalakipan sang mga food supplies.
Sandig sa anti-graft court, si Ampatuan kag Abpi ang ginpahamtangan sang penalidad nga mapreso sang gikan 6 tubtob 10 ka tuig para sa graft kag 10-17 ka tuig naman para sa malversation.
Magluwas sini, ginapabayad man sang korte ang duha sang nagalab-ot sa P16 million nga penalidad.
