Nakabati na kita sang mga masubo nga istorya nga napatay ang bride ukon groom, apang ginpadayon gihapon ang seremonya sang kasal bangud sa tuman nga gugma sang nabilin nga partner kag gusto sini nga mag-commit kag dayunon ang ila plano nga “forever.”
Apang nakabati ka na bala sang bersyon nga pareho gid nga napatay ang bride kag groom apang ginpadayon man ang ila kasal?
Natabo ini sa magkahagugma nga sanday Yang Jingshan, 31, kag Lee Xueying, 32 nga lunsay Malaysian nationals.
Sang Mayo 2024, dungan sila nga napatay bangud nagbaliskad ang ila salakyan samtang nagabyahe sa Perak sa northwestern part sang Malaysia.
Antes ang insidente, tatlo ka tuig na sila nga magka-relasyon.
Isa ka international referee para sa Malaysian Dragon and Lion Dance Sports Association si Yang, samtang ang girlfriend naman sini nga si Lee ang naga-trabaho sa isa ka food processing factory.
Hunyo 2 kuntani plano pa sang boyfriend nga magselebrar sang iya kaadlawan sa Thailand kun sa diin maga-propose man ini sang kasal kay Lee.
Tanan ini ang naalimunaw bangud sa trahedya nga natabo sa dalan.
Apang, sa pag-istoryahanay sang ila ginikanan, wala nakaupang mangin ang kamatayon agud nga madayon ang ila matahum nga plano.
Sang sini lang nga Hunyo 17, ginpatigayon ang isa ka “ghost marriage” sa isa ka funeral hall nga gintambungan sang ila mga pinalangga sa kabuhi. Naghimo ang ila pamilya sang wedding photo sang duha kag ini ang ginbasbasan para sa ritual.
Ginbutang man sang ginikanan ni Yang sa obituary nga daughter-in-law nila si Lee bilang opisyal nga pagbaton sini sa ila pamilya.
Nahibaluan nga base sa daan nga tradisyon nga iya sang mga Chinese, kun ang tawo mapatay kag indi matuman ang ila nga wish, indi ini mahatagan sang kalinungan sa pihak nga kabuhi rason nga nagapakita ini sa ila buhi nga mga himata.
Ini nga pagpati ang nag-impluwensya man pati sa iban nga mga lugar lakip na sa East Asian countries kaangay sang North Korea kag Japan amo man sa kaso nanday Yang kag Lee.
