KORONADAL CITY – Gindagsa sang mga manuglantaw ang madinuagon nga street dancing competition kadungan sang selebrasyon sang Silver Tnalak festival kag 58th founding anniversary sang probinsiya sang South Cotabato sa pihak sang mga pagpamahog sa seguridad.
Nakisadya ang mga South Cotabatenos kag mga turista sa paglantaw sa performance sang siyam ka mga contingents gikan sa tatlo ka mga kategorya sang competition kun diin ginpakita ang manggaranon nga kultura sang South Cotabato.
Ang mga kategorya nga ini ginalakipan sang Madal Be’lan, Kadsagayan Alalan kag Kasadyahan sa Kapatagan.
Nagdaug sa “Best in Street Parade” nga tigP100,000 nga premyo ang City of Koronadal para sa Madal Bee’lan, Bukay Pait National High School sang Tantangan sa Kasadyahan sa Kapatagan kag Bacongco National High School sang Koronadal City sa Kadsagayan A Lalan.
Samtang sa Grand Showdown, nangin kampiyon ang banwa sang Tboli sa Madal Be’lan nga may premyo nga P350,000; Bukay Pait National High School sang banwa sang Tantangan kag Bacongco National High School sang siyudad sang Koronadal sa Kadsagayan A Lalan.
Nangin hugot nga seguridad naman ang ginpatuman sa bug-os nga probinsiya kadungan sang katapusan nga adlaw sang mga aktibidad matapos nga una nga naglapta ang report nga may pasigabungon nga bomba sa Tnalak.
Una dir, nagpaandam man si South Cotabato Governor Reynaldo Tamayo Jr sa nagapalapta sang “bomb threat” sa probinsiya nga magapanabat kag pasakaan sang kaso.
![](https://img.bomboradyo.com/koronadal/2024/07/tnalakpi2.jpg)