Patay ang ginakabig nga pinakamataas nga lider kag bomb expert sang terorista nga Dawlah Islamiyah–Hassan Group (DI-HG) sa gintigayon nga operasyon sang kasuldaduhan sa Brgy. Satan, Shariff Aguak, Maguindanao del Sur sang Disyembre 7, 2025.
Ginkilala ni Brigadier General Edgar L. Catu, Commander sang 601st Unifier Brigade, ang napatay nga terorista nga si Ustads Mohammad Usman Solaiman, nga kilala bilang Amir sang DI-HG.
Si Solaiman amo ang utod sang napatay man nga terorista nga si Ustadz Kamaro Usman, nga kabahin man sang DI-HG kag napatay sang Marso 2020 upod ang anay kumander sang BIFF–Karialan Faction nga si Kumander Badi.
Ginkilala man ang napatay nga lider bilang bihasa nga bomb maker kag pamangkin sang kilala nga terorista nga si Basit Usman, anay bomb expert sang Special Operations Group sang BIFF kag may koneksyon sa Abu Sayyaf kag Jemaah Islamiya.
Ginbunyag man sang militar nga si Solaiman kag ang kaupod niya nga si Norodin Hassan alias Andot, nga amo ang Amir for Military Affairs sang DI-HG, ang mga nabilin nga mataas nga alagad sang anay lider nga si Abu Azim, nga napatay sa Mamasapano sang Disyembre 2021.
Ginatamod ang grupo ni Solaiman nga amo ang likod sang madamo nga serye sang karahasan sa Mindanao.
Upod diri ang pambobomba sa isa ka Rural Bus sang Abril 24, 2022 sa Parang, Maguindanao; ang magkasunod nga pagpabuto sa mga bus sang Yellow Bus Line sang Mayo 26, 2022 sa Koronadal City kag Tacurong City; kag ang isa liwat ka pag-atake sa isa pa ka bus sang Yellow Bus Line sang Nobyembre 6, 2022 sa Barangay New Isabela, Tacurong City.
Sila man ang ginatudlo nga responsable sa Husky Bus bombings sang Abril 17, 2023 sa Isulan Integrated Terminal, ang pag-ambush sa mga kasundaluhan sa Barangay Tuayan sa Datu Hoffer Ampatuan, kag ang malala kag brutal nga pagpatay sa tatlo ka sibilyan nga negosyante sang kanding halin Batangas. Padayon nga ginpaniguro sang militar ang pagtugis sa mga nabilin pa nga miyembro sang grupo.
Suno kay Brig. Gen. Catu, dako ang papel sang mga residente nga naghatag impormasyon angut sa presensya sang armado nga grupo sa ila komunidad.
“Ang kooperasyon sang pumuluyo amo ang nagbukas sang dalan agud matandog ang galaw kag lokasyon sang grupo. Tungod sini, nangin madinalag-on ang operasyon batuk sa lider sang Dawlah Islamiyah,” suno sa opisyal.
Ginpasidunggan man ni Major General Jose Vladimir R. Cagara, Commander sang 6th Infantry (Kampilan) Division kag Joint Task Force Central, ang masangkad, madali, kag epektibo nga operasyon sang 601st Brigade kag ang walauntat nga suporta sang mga residente.
“Ginapakita sini nga kon nagahiusa ang komunidad kag ang aton kasundaluhan upod ang iban pa nga security forces sang gobyerno, indi gid makapalagyo ang terorista sa hukmanan sang layi.
Dako guid ang amon pagpasalamat sa pumuluyo sa padayon nga paghatag sang husto nga impormasyon sa JTF Central.”
“Ginahagyo ko man ang nabilin pa nga mga miyembro sang Dawlah Islamiyah nga magpanaug sang ila armas. Andam ang gobyerno nga buligan kamo nga makasugod liwat sang bag-o nga kabuhi upod ang inyo pamilya.
Permi bukas ang dalan sang kalinong para sa mga luyag magbag-o,” dugang pa ni Maj. Gen. Cagara.
