KORONADAL CITY – Ginkoronahan bilang pinakauna nga Miss Texas ang isa ka Asian-American beauty nga nagikan sa banwa sang Banga, South Cotabato.
Ini ang ginkumpirmar sa Bombo Radyo Koronadal ni Mr. Pinoy Gonzales, Bombo International News Correspondent sa Texas USA.
Ginkilala ang lin-ay nga si Averie Bishop, 25 anyos nga isa ka law graduate kag gin-representar ang Carrollton City sa Miss Texas 2022 pageant.
Si Bishop ang naglutos sa 40 ka iban pa nga mga contestants nga nagpartisipar sa nasambit nga kompetisyon.
Sa pagdaug ni Bishop siya ang maga-representar sa estado sang Texas para sa Miss America 2022.
Nahibaluan nga magluwas nga matahum kag maalam ini nga abogada, isa man siya ka Doctor of Jurisprudence kag social media influencer nga mahilig sa pagtiktok.
Popular si Bishop nga content creator kag may masobra 800,000 TikTok followers na.
Nangin miyembro man siya sang Dallss Mayor’s Anti-Hate & Discrimination Advisory Council sang nagligad nga tuig.
Ang iloy sini nga si Gng. Marevi Sabalilag Bishop ang isa ka Ilongga gikan sa banwa sang Banga,South Cotabato.
Kabulig ni Averie ang Pinay mother nito sa pagdiho sang Tulong Foundation nga nagahatag sang edukasyon, livelihood kag scholarship sa mga “poor but deserving children” sa Pilipinas.
Ginkalipay naman sang LGU-Banga ang nangin kadalag-an sini.
Suno kay Mayor Albert Palencia, isa ka dako nga bugal kag dungog ang ginhatag ni Bishop indi lamang sa iya nga pamilya kundi sa bug-os nga pungsod.
