Si human rights lawyer na si Dino De Leon ay nagpahayag ng pagdududa sa kredibilidad ng 18 kataong nagpakilalang dating Marines na humarap bilang mga testigo sa pagdinig ng Senate Blue Ribbon Committee noong Hunyo 4 kaugnay ng umano’y mga iregularidad sa mga flood control projects.
Sa isang press conference noong Hunyo 6, ipinaliwanag ni De Leon ang ilang dahilan kung bakit aniya ay mahirap paniwalaan ang testimonya ng mga naturang testigo. Ayon sa kanya, apat sa mga ito ay walang anumang rekord sa Armed Forces of the Philippines, habang ang iba naman ay natanggal sa serbisyo o na-discharge nang may kaparusahan.
Kinuwestiyon din ng abogado ang kanilang mga pahayag tungkol sa umano’y P805 bilyong kickbacks mula sa flood control projects. Aniya, hindi magkakatugma ang mga detalye ng kanilang mga salaysay, kabilang ang alegasyong inilalagay ang pera sa mga maleta bago ito ihatid sa matataas na opisyal ng gobyerno.
Dagdag pa ni De Leon, ilan sa mga testigo ay may mga naunang rekord ng hindi pagsasabi ng totoo, bagay na lalo umanong nagpapahina sa kanilang kredibilidad.
Pinuna rin niya ang paraan ng pagtatanong sa pagdinig, na aniya’y naglalaman ng mga “leading questions.” Dahil dito, lumitaw umano na ang ilan sa mga testigo ay tila naihanda o naturuang mabuti kung paano sasagutin ang mga tanong na ibabato sa kanila.
