Nagapabilin nga kritikal ang kahimtang sang komendyante nga si Gil Aducal Morales o mas kilala bilang Ate Gay, nga yara gihapon sa Intensive Care Unit (ICU) sang Asian Hospital.
Suno sa iya pamilya, gindala siya sa emergency room sang Oktubre 17 matapos mag-antos sang septic shock kag acute respiratory failure bangud sa pneumonia.
May natukiban man sa iya nga mucoepidermoid squamous cell carcinoma, isa ka talagsaon nga klase sang kanser.
Mas naglala pa ang iya kahimtang sang Oktubre 29 matapos siya ma-stroke nga nagresulta sa kadaot sa tuo nga bahin sang iya utok.
Sa karon, nagasalig gihapon siya sa mga life-support machine agud masuportahan ang importante nga mga obra sang iya lawas.
Ginpahayag sang pamilya nga kritikal kag guarded gihapon ang iya kondisyon.
Samtang, liwat nga nagapangayo sang bulig-pinansyal ang pamilya para sa nagapadayon nga pagbulong kag mga kinahanglanon ni Ate Gay sa ospital.
Nagapangayo man sila sang paghangop sa padayon nga pagpangayo sang suporta sa mga ahensya sang gobyerno, charity organizations kag pribado nga mga indibidwal.
Samtang, ginpasalamatan man sang pamilya ang tanan nga naghatag sang bulig, pangamuyo kag suporta, samtang nagapadayon sila sa paglaum para sa pag-ayo sang komedyante.
