Nagpanawagan sang pinansyal nga bulig ang pamilya sang komedyante nga si Gil Morales, nga mas kilala bilang Ate Gay, samtang padayon ini nga ginabulong sa Intensive Care Unit (ICU) sang Asian Hospital and Medical Center sa sulod sang halos isa na ka semana.
Sa opisyal nga social media page ni Ate Gay, nagpangabay ang iya pamilya sa publiko nga maghatag sang pinansyal nga bulig agod makatapo sa nagapadayon nga galastuhon sa ospital kag iban pa nga kinahanglanon sang komedyante samtang ginabulong.
Ginpahayag man sang pamilya ang ila pagpasalamat sa tanan nga nagpaabot sang bulig, naghatag sang donasyon kag nagpadala sang mga pangamuyo para sa kaayuhan ni Ate Gay. Suno sa ila, dako nga bulig ang bisan ano nga kantidad nga mahatag sa tunga sang ila ginatubang nga sitwasyon.
Sa pihak sang mga kabudlayan, nagapabilin ang paglaum sang iya pamilya nga mag-ayo ang kahimtangan sang komedyante. Nagapadayon man ang pagpaabot sang mga netizen sang ila mga mensahe sang suporta kag pangamuyo para sa iya madali nga pag-recover.
Madumduman nga sang nagligad nga tuig, ginpahayag ni Ate Gay nga siya may stage 4 cancer. Antes sini, nagpatigayon man ang komedyante sang “Celebration of Life,” kun sa diin nagtipon ang iya pamilya, mga abyan kag mga kaupod sa industriya agod ipaambit ang ila paghigugma, pagpasalamat kag mga mensahe para sa iya.
Sa karon, nagapadayon ang paghangyo sang pamilya sang bulig samtang nagalaum sila nga makabawi si Ate Gay kag mag-ayo ang iya kahimtangan.
