Posible nga magsaka tubtob sa 50 porsyento ang presyo sang mga bulak sa nagahilapit nga pagsaulog sang Todos los Santos kag Pista Minatay, bangod sa pagsaka sang presyo sang gatong kag sang mga balaklon halin sa mga supplier.
Sa interview sang Bombo Radyo Koronadal kay Maria Carmen de Tomas, flower vendor sang Amara Flower Shop, ginpahayag sini nga ang mga bulak nga ginabaligya anay sa kantidad nga P100 tubtob P150 mahimo magsaka sa P300 tubtob P350.
Suno kay De Tomas, isa sa mga rason sang posible nga pagsaka sang presyo amo ang pagmahal sang gatong nga nagadugang sa gasto sa transportasyon, lakip na ang pagsaka sang presyo nga ginapatuman sang ila mga supplier.
Apang, ginpaathag man niya nga mahimo pa magbag-o ang presyo sang mga bulak bangod wala pa sang pinal nga presyo nga ginpatuman sa merkado sa karon.
Bangud sini, gin-awhag ni De Tomas ang publiko nga magbakal sang mga bulak sa ila tindahan bilang suporta sa ila negosyo, ilabi na sa tion sang nagahilapit nga pagsaulog sang Todos los Santos kag Pista Minatay.
Nagpanawagan man siya sa gobyerno nga maghimo sang nagakaigo nga mga tikang agod mapanubo ang presyo sang gatong, nga suno sa iya makabulig sa pagpauntat sang pagsaka sang mga galastuhon kag makahatag sang kahigayunan sa mga negosyante nga makabawi sa ila mga ginagasto sa negosyo.
