Nagpaalinton ang Koronadal City Health Office sa publiko nga indi basta-basta magkaon sang mga tanom ukon pagkaon nga makita sa social media nga wala pa masiguro ang kaluwasan sini.
Sa interview sang Bombo Radyo Koronadal kay Dr. Vincent Ende, City Health Officer sang Koronadal, ginpahayag sini nga indi tanan nga impormasyon nga nagalapta sa social media ang matuod kag masaligan, gani kinahanglan ini nga beripikahon antes sundon.
May kaangtanan ini sa natabo nga pagkahilo sang 14 ka indibidwal nga nagkaon sang kasla ukon tuba-tuba sa Sitio Kolondafok, Barangay Topland, sa Syudad sang Koronadal.
Bangud sini, ginpahanumdom ni Dr. Ende ang publiko nga mangin mahinalongon sa pagpili sang pagkaon kag likawan ang pagtilaw sang mga tanom ukon pagkaon nga wala nahibaluan ang kaluwasan, bisan pa nga ginapakita ini sa social media.
Ginpanawagan man sang opisyal ang mga ginikanan nga hugot nga bantayan ang ila mga kabataan, ilabi na ang ila mga ginalantaw sa social media kag ang mga pagkaon nga ila ginakaon, agud malikawan ang posible nga pagkahilo kag iban pa nga peligro sa panglawas.
Ginpahanumdom man niya ang tanan nga mag-usisa anay sang kamatuoran sang impormasyon nga makita online kag magpangayo sang laygay sa mga eksperto antes magtilaw sang indi pamilyar nga pagkaon ukon tanom.
