Ginpaklaro sang kampo ni Vice President Sara Duterte nga indi pamahog ang ila pahayag nga mahimo mag-atubang sang kasubong nga kahimtangan ang iban pa nga impeachable officials, lakip ang Presidete, kun mahimo nga kasuhan kag imbestigaran ang isa ka nagapungko nga bise presidente.
Ini ang sabat sang kampo sang bise presidente sa pahayag ni Palace Press Officer Claire Castro, nga nagpamangkot kun nagpagwa naman sang bag-o nga pamahog ang kampo ni Duterte.
Suno sa legal counsel ni VP Sara sa kaso nga grave threats nga si Atty. Paul Lawrence Lim, “statement of fact” lang ini kag indi isa ka pamahog.
Depensa niya, kun mahimo nga kasuhan ang bise presidente samtang nagapungko, mahimo man ini matabo sa iban pa nga impeachable officials.
Madumduman nga nauna na nga ginpangabay sang kampo ni Duterte nga ipasaka ang dismissal ukon ibasura ang grave threats cases bangud sa gin-angkon nga kakulang sang hurisdiksyon sang korte.
Nagsumiter man sila sang mosyon nga ipaisol ang arrest warrant samtang ginahulat ang desisyon bahin sa isyu sang hurisdiksyon.
