KORONADAL CITY – Kahilwayan sa mga mananakop kag kapigaduhon ukon malayo sa gutom ang matuod nga kahulugan sang “kahilwayan” sang isa ka pungsod.
Ini ang kabahin sang mensahe ni South Cotabato Governor Reynaldo Tamayo Jr. kadungan sang selebrasyon sang ika-126 ka tuig nga anibersaryo sang “Araw ng Kalayaan”.
Suno pa kay Governor Tamayo, ang Pilipinas ang isa na ka independent country apang kinahanglan pa sang kahilwayan gikan sa kabudlay kag kapigaduhon.
Bangud sini, luyag sang gobernador nga e-allign ang mga programa sang national government sa Local Government Units (LGUs) bangud mas nakahibalo ang idalom sa panginahanglanon sang katawhan.
Kasubong na lamang sang ginaduso sini nga amat-amat nga dulaon sang Provincial Government ang dole-out system kag i-convert na lamang sa sustainable livelihood program.
Ini agud mabuligan ang mga tawo nga magtinguha pa sa pagpangabuhi kag indi magsalig sa gobyerno.
Gin-insister pa sang opisyal nga madamo pa sang mga pigado sa karon nga dapat buligan agud makabangon.
Sa paghiliusa sang tanan kag pagbinuligay masigurado nga sa pag-abot sang panahon malab-ot naton ang matuod nga kahilwayan nga makapangabuhi ang tanan sa isa ka progresibo nga pungsod.
