Ginkumpirmar ni U.S. President Donald Trump sang Martes nga nagsugot na ang Israel sa mga kondisyon para sa 60 ka adlaw nga tigil-putukan sa Gaza, kag ginpahayag niya nga ang Hamas nga batonon ang kasugtanan antes pa maglala ang sitwasyon.
Nagapreparar man si Trump para sa isa ka meeting kay Israeli Prime Minister Benjamin Netanyahu sa White House sa Lunes, Hulyo 7, nga may katuyuan nga buligan ang duha ka panig nga magkasugtanay kag makab-ot ang kasugtanan para sa pagbuhi sang mga hostage.
Suno kay Trump, ang Qatar kag Egypt ang magpresentar sang final nga proposal nga ginapangabay niya nga batonon sang Hamas, kay kon indi ini pagbatunon, posible pa nga maglala ang kahimtangan sa rehiyon.
Wala man ginbukas ni Netanyahu ang mga detalye sang iya pagbisita sa Washington, maluwas sa trade deal kag isyu sa Iran.
Bisan pa nga positibo ang pahayag, may pagduha-duha gihapon ang Hamas sa gin-offer ni Trump nga ginatawag niya nga “best and final offer.”
Madumdman nga una na nga napaslawan ang mga negosasyon bangud wala nagsugot ang duha ka panig sa kondisyon sa pagtapos sang gyera bilang kabahin sang ceasefire.
Sa piyak nga bahin, may meeting man si Israeli Minister for Strategic Affairs Ron Dermer sa Washington may kaangtanan sa posible nga tigil-putukan sa Iran kag iban pa.
Sa pihak sini, masobra 150 ka international humanitarian groups ang nagpanawagan nga untaton na ang kontrobersyal nga sistema sang pagpanagtag sang bulig sa Gaza bangud sang kinagamo kag naglala nga kahimtangan sang bayolensya.
Nagpaguwa man sang pahanumdom si Defense Minister Israel Katz batok sa posible nga missile attack halin sa Yemen, halin sa Iran-backed Houthi rebels matapos ang 12 ka adlaw nga gyera.
Suno kay Katz, posible nga ang Yemen mangin pareho man ang kapalaran sa Tehran.
Sa pihak sini, nagpahayag ang Houthi nga magapadayon sila sa pagsuporta sa Gaza tubtob indi pa matapos ang ginahimo sang Israel.
