KORONADAL CITY – Patay sa special operation sang Western Mindanao Command Joint Task Force Central ang spokesperson sang Islamic State of Iraq and Syria-East Asia (ISIS-EA) sa Crossing Salbo, Barangay Poblacion, Datu Saudi Ampatuan, Maguindanao.
Ini ang ginkumpirmar ni LT. Col. Dennis Almato, spokesperson sang 6th ID Philippine Army sa interview sang Bombo Radyo Koronadal.
Ginkilala ang napatay nga si Abdulfatah Omar Alimuden alyas Abu Huzaifah nga ginakabig man finance officer sang terorista nga grupo.
Ang nasambit nga operasyon ang ginpatigayon sang 601st Infantry Brigade, 40th Infantry Battalion kag intelligence units sang Philippine Army.
Magluwas sa spokesperson sang ISIS, si Abu Huzaifah ang nagapatigayon sang financial transactions sang Daulah Islamiyah-Philippines to the ISIS Central.
Kadungan sini, gindayaw naman ni Western Mindanao Command Chief Lt. Gen. Alfredo Rosario, Jr. ang tropa sang militar kasunod sang madinalag-on nga operasyon batuk kay Abu Huzaifah.
