Simula sa susunod na taon, ipatutupad na ang paggamit ng Intervention Monitoring Card (IMC) sa pamamahagi ng tulong pinansyal para sa mga magsasaka na nakalaan sa pagbili ng abono.
Ayon kay Department of Agriculture Secretary Francisco Tiu Laurel Jr., layunin ng IMC na matiyak na ang pondong ibinibigay ay magagamit lamang sa pagbili ng abono at hindi sa ibang bagay.
Sa pamamagitan ng sistemang ito, mas makokontrol ang paggamit ng pondo at masisiguro na ang mabibiling abono ay angkop sa mga pananim ng mga magsasaka. Inaasahan ding makatutulong ito upang mapataas ang ani at maiwasan ang pag-aaksaya ng mga yaman.
Dagdag pa rito, makatutulong ang programa upang maging mas maayos, organisado, at transparent ang pamamahagi ng tulong, lalo na sa panahon ng pagtatanim.
Inatasan din ang mga Regional Offices ng Department of Agriculture na palakasin ang pagsasanay sa mga magsasaka hinggil sa paggamit ng biofertilizer bilang alternatibong pataba.
Layunin ng hakbang na ito na mabawasan ang gastos ng mga magsasaka sa mamahaling abono habang napapanatili ang kalusugan ng lupa.
Inaasahang magreresulta ang mga programang ito sa mas mataas na ani at mas matatag na kabuhayan para sa mga magsasaka sa bansa.
