Ginpaklaro sang Koronadal Sports Division nga yara na sa 98% ang nahatag nga incentives sa mga atleta nga nagpartisipar sa SOCCSKSARGEN Regional Athletic Association (SRAA) Meet 2026.
Sa exclusive nga panayam sang Bombo Radyo Koronadal, ginpahayag ni Division Sports Supervisor Napoleon Comicho nga pila na lang ka atleta ang wala pa naka-claim sang ila incentives, apang ginpasiguro niya nga nagapakig-angot na ang ila talatapan sa mga wala pa nakabaton.
Ginpahayag man ni Comicho nga padayon ang suporta sang lokal nga pamunuan sang Koronadal para sa mga atleta, ilabi na sa 86 ka delegado nga magapartisipar sa Palarong Pambansa 2026 sa Rosario, Agusan del Sur.
Ginpaathag niya nga ang paghatag sang incentives kag logistical support, lakip na ang transportation, uniform, kag training needs, isa ka pamaagi sa paghatag sang moral support kag preparasyon sa mas mataas nga kompetisyon.
Dugang pa ni Comicho, antes pa ang departure sang mga delegado, nagpatigayon man ang Koronadal Sports Division sang pre-departure orientation kag team-building activities para sa mga atleta nga magarepresentar sa Palarong Pambansa, agud masiguro nga preparado sila sa pisikal kag mental nga aspeto sang kompetisyon.
