Nagpatigayon na sang pag-usisa ang ginporma nga komitiba sang lokal nga panguluhan sang Koronadal City sa mga gasoline station agud masiguro nga nagasunod ang mga ini sa nagapatuman nga mga pagsulundan sa presyo sang gatong.
Sa interview sang Bombo Radyo Koronadal, ginpahayag ni Mayor Erlinda Araquil nga gintukod ang komitiba kasunod sang mga reklamo sang una nga may mga gasoline station nga nagatago sang ila suplay kag nagasiling nga naubusan na sila sang gatong, samtang nagahulat sang pagsaka sang presyo antes liwat magbaligya.
Suno sa alkalde, nagapatigayon na sang pag-usisa ang natakda nga komitiba kag mahimo mag-atubang sang nagakaigo nga silot ang mga mapamatud-an nga nagalapas sa mga nagapatuman nga ordinansa.
Gani, ginawhag ni Araquil ang publiko nga ipahibalo sa lokal nga panguluhan ang bisan ano nga paglapas sang mga gasoline station kag maglakip sang pamatuod agud maaksyunan ini.
Ginpasalig man sang alkalde nga indi nila pagpalampason ang pormal nga mga reklamo, agud mapanalipdan ang mga konsumidor batok sa indi makatarunganon nga mga pamaagi sa pagbaligya sang gatong.
