Nagpanawagan ang International Criminal Court (ICC) sa tanan nga mga pungsod kag ila mga korte nga padayon nga suportaran ang pagpatuman kag pagpalig-on sang international law sa bug-os nga kalibutan.
Ginpahayag ini ni ICC President Judge Tomoko Akane kasabay sang ika-28 nga anibersaryo sang Rome Statute, nga nagtukod sa ICC bilang permanente nga international criminal tribunal.
Suno kay Akane, ang ICC amo ang nagaisahanon nga permanente nga korte nga may mandato sa pag-usisa kag pagpasakaan sang kaso ang mga responsable sa mabug-at nga krimen, lakip na ang crimes against humanity, agud wala sang makalikaw sa hustisya.
Ginpabutyag man niya nga importante nga mapabilin nga independente ang tribunal kag hilway sa ano man nga impluwensiya nga pulitikal agud matuman sini ang iya mandato.
Ginkilala man sang ICC ang nagapadayon nga mga pag-atake kag naganubo nga commitment sang pila ka mga pungsod sa pagsuporta sa international law, lakip ang panawagan ni US President Donald Trump nga kakason ang ICC.
Bisan pa sini, ginpasiguro ni Akane nga magapadayon ang korte sa pagpatuman sang hustisya kag sa paghatag sang paglaum sa mga biktima sang seryoso nga mga krimen sa nagkalainlain nga bahin sang kalibutan.
