Ginbasura sang International Criminal Court (ICC) ang hingyo sang kampo ni anay Presidente Rodrigo Duterte nga higpitun ang mga ginabaton nga identification documents sang mga biktima sang drug war sa kaso nga crimes against humanity batok sa iya.
Sa desisyon nga ginpagwa sang Abril 17, ginpahanugutan sang ICC Pre-Trial Chamber I ang rekomendasyon sang ICC Registry nga magbaton sang nagkalain-lain nga klase sang government-issued IDs pareho sang birth certificate, senior citizen card, barangay certificate, driver’s license, kag iban pa — indi lang pasaporte ukon National ID nga ginapangayo sang kampo ni Duterte.
Gin-insistir sang abogado ni Duterte nga si Nicholas Kaufman nga kinahanglan higpitun ang requirements agud malikawan ang fraud kag iban pa, apang wala nagsugot ang mga abogado sang mga biktima, nga ginatawag ang proposal nga “anti-poor.”
Suno sa ICC, sakto na ang proseso sang verification subong agud masiguro ang pagkakilala sang mga biktima kag malikawan ang pandaraya.
Samtang, gintalana man sang ICC ang deadline sang prosekusyon tubtob Hulyo 1 agud maisumite ang tanan nga ebidensya nga ipresentar sa confirmation-of-charges hearing sa Setyembre 23, 2025.
Lakip diri ang testimonya sang mga witness, video kag audio recordings, kag masobra sa 9,000 pages nga dokumento.
