Ginpasaka na sang House prosecution panel ang pormal nga listahan sang ila mga ebidensya sang Martes, antes sang Oktubre 23 nga deadline, agud malikawan ang posible nga paglangan sa pagpadayon sang impeachment trial ni Vice President Sara Duterte sa Nobyembre 9.
Suno kay private prosecutor Lorna Kapunan, paagi sa mas temprano nga pagpasaka, mas temprano man nga makasugod ang depensa sa 10 ka adlaw nga gintalana sang impeachment court para sa ila mga komento kag pagsupak sa mga ebidensya. Makahatag man ini sang dugang nga tion sa korte agud masolbar ang mga isyu antes ang masunod nga pagdinig.
Dugang ni Kapunan, nagapadayon ang pagpanghanda sang prosekusyon bisan tatlo ka semana ang recess matapos nila matapos ang pagpresentar sang ila mga ebidensya.
Gintalana sang Senado ang Oktubre 23 bilang deadline sa pormal nga pagpasaka sang mga dokumento kag iban pa nga ebidensya nga nagasuporta sa ikaduha nga artikulo sang impeachment.
Ini na lamang ang nabilin nga kaso matapos gin-withdraw sang prosekusyon ang tatlo ka iban pa nga artikulo nga may kaangtanan sa confidential funds, bribery kag grave threats.
