Nagpahayag sang pagkabalaka ang pila ka multicab kag jeepney drivers sa Koronadal City sa posible nga pagbalhin sang ila terminal pakadto sa Chinatown bangud sa madugangan nga kabudlayan sa ila pagpangita sang pasahero kag pang-adlaw-adlaw nga pangabuhian.
Sa interview sang Bombo Radyo Koronadal kay multicab driver nga si Rex Ayong, iya ginpahayag nga mangin hassle para sa ila kag sa mga pasahero ang plano nga pagbalhin sang terminal bangud malayo na ini sa sentro sang syudad.
Ginpahayag man niya nga madugangan ang gastuhon sang mga pamilya, ilabi na ang mga ginikanan nga may mga kabataan nga nagasakay adlaw-adlaw pakadto sa eskwelahan kag pabalik sa ila mga puluy-an.
Posible nga magdugang ang kinahanglanon nga allowance kag balon sang mga estudyante bangud sa mas malayo nga byahe.
Dugang pa ni Ayong, nabalaka man siya nga mahimo magnubo ang ila kadamuon sang pasahero kun ibalhin ang terminal sa Chinatown, nga posible makaapekto sa ila kita bilang mga driver.
Bangud sini, nagapanawagan siya sa lokal nga panguluhan sang Koronadal nga usisaon liwat ang plano kag konsiderahon ang pagpabilin sang multicab kag jeepney terminals sa ila kasamtangan nga lokasyon agud malikawan ang dugang nga kabudlayan sa mga driver kag commuter.
