Nagkadaku ang ihap sang mga may obra sa sektor sang turismo sa South Cotabato, kasunod sang pagpatigayon sang gobyerno probinsyal sang mga programa sa pangabuhian kag pagpalapad sang mga asosasyon sa turismo.
Sa interview sang Bombo Radyo Koronadal kay Francisco Cerbo Jr., Tourism Operations Officer I, ginpahayag sini nga kabahin sang mga tikang sang gobyerno probinsyal ang paghatag sang mga programa sa pangabuhian agud mabuligan ang mga asosasyon sa turismo kag ang nagkalain-lain nga komunidad.
Suno kay Cerbo, nagadugang ang ihap sang mga may obra sa mga negosyo nga sakop sang sektor sang turismo. Base sa ila datos, 4,724 ang may obra sini nga sektor sang 2023, nga nagsaka sa 5,040 sang 2024 kag 5,184 sang 2025.
Dugang pa niya, nagapasalamat sia sa maayo nga pagbinuligay sang gobyerno probinsyal, mga opisyal sang lokal nga panguluhan kag mga komunidad nga nagabulig sa pagpalambo sang turismo sa probinsya.
Ginkabig ni Cerbo nga patimaan ang padayon nga pagsaka sang ihap sang mga may obra sa sektor sang turismo sang nagapadayon nga pag-uswag kag pagpadayon sang mga programa sa turismo sa South Cotabato.
