Ginpaathag sang Korte Suprema nga kinahanglan magpasaka sang separado nga kaso batok sa mga opisyal nga ginatudlo nga responsable sa gin-alegar nga iligal nga pagdugang ukon pagbag-o sang pila ka pondo sa nagligad nga mga national budget.
Suno kay Supreme Court Spokesperson Atty. Camille Sue Mae Ting, ang mga nagatinguha nga pasabton ang mga opisyal nga nalakip sa kontrobersiya kinahanglan magpasaka sang bag-o nga kaso sa nagakaigo nga korte.
Mahimo nga magpasaka sang sibil, kriminal ukon administratibo nga kaso, depende sa kinaiya sang gin-alegar nga paglapas kag sa ebidensya batok sa mga opisyal nga nalakip.
Ginpat-od man ni Ting nga ang bag-o nga desisyon sang Korte Suprema parte sa mga national budget sang 2024, 2025 kag 2026 nagaangot lamang sa mga aksyon sang Kongreso.
Gani, wala sa sakop sang amo nga desisyon ang pagdeterminar sang personal nga responsibilidad sang tagsa ka opisyal nga ginatudlo nga may kaangtanan sa kontrobersyal nga mga pagbag-o sang pondo.
Paagi sa separado nga mga kaso, mahimo nga matilawan sa nagakaigo nga proseso legal ang mga alegasyon kag mapanabat ang mga responsable kun mapamatud-an nga may paglapas sa laye.
