Mabudlay karon ang dalan nga paguwa kag pagsulod sa duha ka Sitio sang isa ka barangay sa banwa sang Tulunan, Cotabato matapos nga maitala ang pagguho sang duta kag pagbaha sa nasambit nga lugar.
Sa ginpaguwa nga datos sang Municipal Disaster Risk Reduction and Management Council (MDRRMC) Tulunan, naglabaw sa isa ka gatos ka pamilya ang apektado sang pagguho sang duta sa mga Sitio sang Tibok kag Colondatal sa Barangay Bacung sang nasambit nga banwa.
Bangud sa natabo nga landslide, natabunan sang duta ang dalan padulong sa eskwelahan kag paguwa sa Poblacion area sang banwa sang Tulunan gani na-stranded ang madamo nga mga motorista pauli sa ila mga balay.
Magluwas sini, mas ginpili man sang mga estudyante nga indi anay magpauli sa ila mga balay kag nagpabilin sa ila mga paryente kag kakilala malapit sa eskwelahan bangud sa malain nga panahon kag indi gilayon nga nalimpyohan nga dalan.
Gilayon naman nga naghimo sang clearing operation ang barangay sa bulig sang LGU Tulunan agud nga may maagian ang mga tawo.
Apang indi madali ang paglimpyo sa dalan sang mga nagguho nga duta bangud sa padayon nga pag-ulan.
Samtang, naapektuhan naman sang baha ang pila ka mga balay sa nasambit nga lugar matapos nga mag-awas ang tubig baha sa suba.
Sa karon, nagapadayon ang clearing operation kag damage assessment sa halit nga ginbilin sang kalamidad sa nasambit nga mga lugar.
Una na nga ginsiling ni Office of the Civil Defense Region 12 Information Officer Jorie Mae Balmediano nga naka standby ang ila ahensiya sa bug-os nga rehiyon ilabi na sa mga lugar nga ginakabig nga landslide kag flash flood prone areas lakip na ang banwa sang Tulunan.
Nagapadayon naman ang panawagan sang OCD 12 sa mga pumuluyo sa bug-os nga Socksargen nga mag-amping kag mag-vigilante agud nga malikawan ang kapahamakan.
