KORONADAL CITY – Naglab-ot sa 180 indibidwal ukon 37 pamilya ang nagbakwit matapos nga nagluntad ang engkwentro sa tunga sang militar kag rebelde nga New Peoples Army (NPA) sa Sitio Demamis, Barangay Laconon, Tboli, South Cotabato.
Ini matapos nga matukiban man sang militar kag makuha ang kuta sang New Peoples Army (NPA) sa nasambit nga banwa.
Ginpahayag ni Western Mindanao Command Chief, Lt. Gen. William Gonzales natukiban ang kuta sang mga rebelde nga gin-abandonar nga ginapamunuan ni Alias Mcmac samtang nagapatigayon sang combat clearing operation sang tropa sang 5th Special Forces Battalion sa hilit nga lugar sa Barangay Laconon.
Ang nasambit nga kampo ang ginapatihan nga gin-abandonar matapos mangin target ang mga ini sang serye sang mga ginapatigayon nga operasyon sang 1st Mechanized Brigade.
Narekober sa kuta sang mga rebelde ang assorted war materials nga ginalakipan sang M16 rifle, M16 magazine, mga medical paraphernalia kag madamo nga iban pa.
Sa karon, padayon ang ginahimo nga pagpangita sa mga nakapalagyo nga mga rebelde.
Kaangot sini, ginaawhag ni South Cotabato Governor Reynaldo Tamayo Jr. nga padayon ang pag-awhag sang gobyerno sa mga rebelde nga magsungka na agud makapangabuhi sang malinong kag matawhan.
Madumduman nga madamo naman sang mga katapu sang rebelde nga NPA ang nagsungka na sa mga otoridad laki na diri ang isa anay ka babaye nga foreigner nga nagadala bangud sa kabudlay sa pagpanago sa kabukiran.
