Wala pa sang pinal nga desisyon ang may kaangtanan sa posible nga pag-postpone ukon pagbag-o sang iskedyul sang Barangay kag Sangguniang Kabataan Elections (BSKE) 2026, suno kay South Cotabato Governor Reynaldo Tamayo Jr.
Ginpahayag ni Tamayo nga yara pa sa deliberasyon sang Kongreso ang mga panukala may kaangtanan sa palaabuton sang BSKE, lakip na ang suhestyon nga palawigon sa lima ka tuig ang termino sang mga barangay kag SK officials.
Suno sa gobernador, kon ini nga panukala ang mapasar, posible nga sa una nga Lunes sang Nobyembre 2028 na ipatigayon ang masunod nga BSKE.
Gin-ako ni Tamayo nga bisan ano nga desisyon sang Kongreso may epekto sa preparasyon sang mga lokal nga panguluhan, ilabi na bangod sang mga regulasyon sa tion sang election period.
Lakip sa mga ini ang mga limitasyon sa pag-hire sang empleyado, paghatag sang promosyon, kag iban pa nga transaksyon sang gobyerno nga nagakinahanglan sang clearance halin sa Commission on Elections (COMELEC) agud malikawan ang posible nga paggamit sang gahum sang gobyerno para sa pulitika.
Suno pa kay Tamayo, nagahulat lamang siya sa resulta sang pagtalakay sang Kongreso kag nagalaum nga ang ila desisyon mangin base sa layi kag para sa kaayuhan sang publiko.
Sang ginpamangkot kon iya ginapaboran ang postponement ukon ang pagpadayon sang eleksyon, ginpili ang gobernador nga indi anay maghatag sang personal nga posisyon agud malikawan ang posible nga conflict of interes bilang isa ka opisyal sang ehekutibo.
Apang ginpahanumdom niya nga importante nga bahin sang demokrasya ang eleksyon kag ginpasiguro nga iya respetuhon kag sundon ang bisan ano nga pinal nga desisyon sang Kongreso.
