KORONADAL CITY – Nagapadayon sa karon ang imbestigasyon sa pagpangluthang sa anay municipal councilor kag kasamtangan nga executive secretary ni POlomolok Mayor Bernie Palencia nga si Rhyolite Balili.
Ini ang nangin pahayag ni PLT.COL. Joseph Forro, Chief of Police sang Polomolok Municipal Police Station sa interbyu sang Bombo Radyo Koronadal.
Ginpahayag ni Forro, nga nagapadayon man ang information gathering kag dako ang mabulig sa kuha nga CCTV fooatge nga kung sa diin ginalantaw nila ini nga isa ka sensitibo nga kaso.
Dugang pa sang opisyal, nakakuha man sila sang impormasyon natuhoy sa direksyon sang mga suspek gikan sa Municipal plaza kun diin ginluthang ang biktima.
Nagpatawag man gilayon sang emergency meeting si Mayor Palencia kag nahisgutan nga pagadumilian man ang pagbitbit sang armas sa sulod sang munisipyo mangin ang mga men in uniform.
Pagadumilian naman ang pagsuksok sang helmet sang mga motorista agud nga mahapos nga makilala ang mga riding-in-tandem criminals.
Kaangot sini, nagpahayag man ang alkalde sang banwa nga magahatag ini sang P500K nga reward money sa mga informant nga magahatag sang impormasyon sa mga suspek.
Dako man ang pagpati sang alkalde nga siya ang target sang mga kriminal kag pulitika suno pa ang motibo.
